١. مقدمة
أركان («أركان»، «نحن») تطبيق لتنظيم ميزانية الزواج وتجهيز البيت، بمساحة مشتركة للعريس والعروس. توضّح هذه السياسة شو البيانات اللي بنجمعها لما تستخدم تطبيق أركان أو موقعه، وليش بنجمعها، ووين بتنحفظ، ومين بيوصلها، وشو حقوقك.
كتبنا هاي السياسة بناءً على طريقة عمل التطبيق فعليًا. إذا تغيّر شي جوهري، بنحدّث هاي الصفحة وتاريخ «آخر تحديث». بنسعى للالتزام بقانون حماية البيانات الشخصية الأردني رقم (24) لسنة 2023 والأنظمة الصادرة بموجبه.
٢. البيانات اللي بنجمعها
بنجمع بس البيانات اللازمة لتشغيل التطبيق، وهي:
- بيانات الحساب: رقم الهاتف (هو وسيلة الدخول)، وتاريخ إنشاء الحساب وآخر نشاط.
- بيانات الملف الشخصي: الاسم اللي بتختاره ليظهر لشريكك، ودورك (عريس أو عروس)، واللغة والمنطقة الزمنية والمظهر، وصورة شخصية إذا أضفتها.
- إجابات البداية: مرحلة التحضير، أهدافك، موعد العرس إذا حددته، العملة، الأولوية، والميزانية وتوزيعها. بنطلب تأكيد إنك 18 سنة أو أكثر، وما بنطلب تاريخ ميلادك.
- محتوى المساحة: كل اللي بتدخلوه: الأقسام، المشتريات وأسعارها والمورّدين ومواعيد التوصيل، الدفعات ومين دفعها، الهدايا والنقوط، المهام، الملاحظات، والمرفقات (صور أو ملفات PDF) إذا أضفتوها.
- بيانات المشاركة: أعضاء المساحة وأدوارهم، والدعوات، وسجل النشاط (مين أضاف أو عدّل شو وإمتى).
- بيانات الجهاز والجلسة: اسم الجهاز ونظامه وإصدار التطبيق، ورمز الإشعارات (Push token) إذا فعّلت الإشعارات، وسجلات جلسات الدخول.
- بيانات الاشتراك: لما تصير الباقات المدفوعة متاحة: نوع الباقة وحالتها وتاريخ انتهائها ومعرّف العملية من المتجر. ما بنستلم ولا بنخزن أي بيانات بطاقة أو دفع.
- رسائلك إلنا: الملاحظات اللي بترسلها من التطبيق، مع إصدار التطبيق والنظام.
ما بنجمع: موقعك الجغرافي، جهات الاتصال، كلمات سر، أو بيانات بطاقات بنكية. التطبيق بيستخدم أداة تحليلات وحدة بس، PostHog، لإحصاءات استخدام مجهولة (شوف القسم ١٠)، وما في فيه أدوات إعلانات أو تتبّع. والموقع ما فيه أي أداة تحليلات.
٣. البيانات الشخصية وبيانات الآخرين
رقم الهاتف والاسم والصورة بيانات شخصية. كمان المبالغ والمشتريات والدفعات بتكشف معلومات مالية عنكم، فبنتعامل معها بحرص خاص: بتنعرض بس لأعضاء مساحتكم حسب أدوارهم، وبتقدروا تخفوها بزر العين.
إذا كتبت معلومات عن أشخاص ثانيين (مثل اسم مورّد أو اسم حدا قدّم هدية)، تأكد إن عندك سبب مشروع لتسجيلها، وسجّل الحد الأدنى اللازم بس.
٤. بيانات الجمعيات
لما تنظّم جمعية، بتدخل أسماء المشاركين وأرقام هواتفهم (بإيدك أو باختيار جهة اتصال وحدة من دفتر عناوينك). التطبيق بيقرأ جهة الاتصال اللي بتختارها بس، وما بيرفع دفتر العناوين. هاي البيانات بتنستخدم لربط الدعوة بالشخص الصحيح، وما بنبعتلهم رسائل ولا بنستخدمها لأي غرض ثاني.
- المنظّم بيشوف أسماء الأعضاء ودفعاتهم وتأكيدها. كل مشارك بيشوف دفعاته والتزاماته وسجل أحداث الجمعية، بدون مبالغ أو تفاصيل دفعات غيره.
- صور إثبات الدفع (إذا أرفقتها) خاصة: بتنعرض بس لصاحب الدفعة وللمنظّم.
- سجل الجمعية (الدفعات، التأكيدات، الصرف، التصحيحات) بيضل محفوظ طول ما الجمعية موجودة، لأنه سجل مالي مشترك بين أعضائها.
- إذا حذفت حسابك، بنشيل رقم هاتفك من سجلات الجمعيات، وبيضل الاسم المسجّل والسجل المالي للجمعيات اللي شاركت فيها، حتى ما يختل حساب الأعضاء الثانيين. ما بتقدر تحذف حسابك وعليك التزامات بجمعية جارية.
٥. البيانات اللي بترسلها من نماذج الموقع
نموذج الاقتراحات والشكاوى بالموقع بيجمع:
- نوع الرسالة، الموضوع، ونص الرسالة.
- الاسم والبريد الإلكتروني إذا اخترت تكتبهم (اختياري، والبريد بنستخدمه بس للرد عليك).
- لغة الصفحة.
- بصمة مشفّرة (HMAC) لعنوان IP تبعك، مش العنوان نفسه، وبنستخدمها بس لمنع الإساءة وتحديد عدد الرسائل.
ما بنطلب إنشاء حساب لإرسال رسالة، وما بنرفق ملفات من الموقع.
٦. كيف بنستخدم البيانات
- إنشاء حسابك والتحقق من رقم هاتفك وتسجيل دخولك بأمان.
- تشغيل المساحة المشتركة: حفظ بياناتكم وعرضها لكم ولأعضاء المساحة حسب أدوارهم.
- إرسال التنبيهات اللي بتفعّلها: موعد العرس، المهام، الميزانية، الدفعات القادمة ونشاط شريكك. نصوص الإشعارات ما بتعرض مبالغ.
- إدارة الباقات والمزايا المدفوعة لما تصير متاحة.
- الرد على رسائلك واقتراحاتك وتحسين التطبيق بناءً عليها.
- فهم أي شاشات ومزايا بتنستخدم حتى نحسّن التطبيق (إحصاءات استخدام مجهولة، القسم ١٠). بتقدر توقفها من الإعدادات.
- حماية الخدمة: منع الإساءة، تحديد عدد المحاولات، واكتشاف إعادة استخدام رموز الدخول المسروقة.
- الالتزام بأي واجب قانوني.
٧. تخزين البيانات
بيانات حسابك ومساحتك محفوظة بقاعدة بيانات على خوادم أركان (مش بس على جهازك)، وهذا اللي بيخليها توصل لشريكك وترجعلك إذا غيّرت جهازك. الصور والمرفقات محفوظة عند مزوّد تخزين ملفات (Cloudflare R2، داخل الاتحاد الأوروبي). الفواتير والمرفقات خاصة وما بتوصلها إلا من خلال التطبيق.
على جهازك، التطبيق بيحفظ:
- رمز التحديث (Refresh token) بالتخزين الآمن تبع النظام (Keychain أو Keystore).
- نسخة من بيانات المساحة اللي فتحتها، ومسودات الملاحظات، والتغييرات اللي لسا ما انرفعت للخوادم، عشان التطبيق يشتغل حتى بدون إنترنت. هاي النسخة مشفّرة (AES-256) بمفتاح محفوظ بالتخزين الآمن للنظام.
- إذا فعّلت قفل التطبيق: بصمة مشفّرة (Hash) للرمز، مش الرمز نفسه. التحقق بالبصمة أو الوجه بيعمله نظام التلفون، وما بيوصل أركان أي إشي منه.
- إذا أضفت ودجت أو فعّلت بطاقة العد التنازلي: الأيام الباقية وملخّص الميزانية بيبانوا على شاشة تلفونك أو بلوحة الإشعارات، والمبالغ بتضل مخفية إذا كانت مخفية بالتطبيق.
تسجيل الخروج بيمسح بيانات الدخول من الجهاز. التغييرات اللي لسا ما انرفعت بتضل محفوظة ومشفّرة حتى ما تضيع، وبترتفع لما ترجع تسجّل دخول. حذف الحساب بيمسح بيانات أركان من الجهاز.
خوادم أركان وقاعدة البيانات موجودة في فرانكفورت بألمانيا (الاتحاد الأوروبي)، وبعض مزوّدي الخدمة بيشتغلوا من دول ثانية. يعني بياناتك بتنحفظ خارج الأردن، وبننقلها بالقدر اللازم لتقديم الخدمة بس، ومع مزوّدين بيلتزموا بحماية البيانات. الاتصال بين التطبيق والخوادم دايمًا مشفّر (HTTPS).
٨. مزامنة البيانات
لما واحد من أعضاء المساحة يضيف أو يعدّل شي، الخادم بيحفظ التغيير وبيبعث إشارة للتطبيقات الثانية المتصلة حتى تحدّث عرضها. الإشارة ما بتحمل محتوى؛ التطبيق بيطلب البيانات من جديد من الخادم.
- الملاحظات الخاصة والمهام الشخصية ما بتنعرض لغيرك، حتى لشريكك.
- إذا تعدّلت نفس المعلومة من شخصين بنفس الوقت، ما بيُمسح تعديل حدا بصمت؛ التطبيق بيبلغك وبيعرض آخر نسخة.
- إذا أخفى العريس أو العروس المبالغ عن المساحة، الأرقام ما بتنبعث أصلًا لأجهزة العيلة والمساعدين.
٩. الخدمات الخارجية ومزوّدو الخدمة
ما بنبيع بياناتك ولا بنشاركها لأغراض إعلانية. بنستخدم مزوّدين محددين لتشغيل الخدمة، وكل واحد بيوصله بس اللي بيلزم لدوره:
- Twilio Verify: لإرسال رمز التحقق برسالة نصية أو واتساب أو مكالمة. بيوصله رقم هاتفك.
- Cloudflare R2: لتخزين الصور الشخصية والمرفقات (داخل الاتحاد الأوروبي). بنشيل بيانات الموقع والكاميرا من الصورة الشخصية، ومن صور الفواتير والمرفقات بصيغ JPEG وPNG وWebP، قبل ما نحفظها.
- Google Firebase Cloud Messaging وخدمة إشعارات Expo: لتوصيل الإشعارات لجهازك. بيوصلهم رمز الإشعارات ونص الإشعار.
- RevenueCat وGoogle Play وApple App Store: لإدارة الاشتراكات لما تصير متاحة. الدفع بيتم عند المتجر، وإحنا بنستلم حالة الاشتراك بس.
- Render (فرانكفورت، ألمانيا): استضافة خوادم التطبيق وقاعدة البيانات.
- Cloudflare: بيمرّ من خلاله الاتصال بخوادمنا لحمايتها من الهجمات. بيشوف عنوان IP تبعك وبيانات الطلب التقنية.
- Sentry: لتسجيل أعطال التطبيق والخادم حتى نصلّحها. بنشيل منها رقم الهاتف والرموز والمبالغ قبل الإرسال.
- PostHog (بيانات محفوظة بالاتحاد الأوروبي، فرانكفورت): لإحصاءات استخدام التطبيق المجهولة. بيوصله معرّف حساب داخلي عشوائي وأسماء الشاشات والمزايا المستخدمة، بدون أي اسم أو رقم هاتف أو مبلغ أو محتوى (التفاصيل بالقسم ١٠).
- Resend: لإرسال رسائل البريد الإلكتروني لما نحتاجها (مثل الرد عليك). بيوصله عنوان بريدك ونص الرسالة.
ممكن نكشف بيانات إذا طلبتها جهة رسمية مختصة بموجب القانون، وبالحد اللازم بس.
١١. أمن البيانات
من الإجراءات المطبّقة فعليًا:
- الدخول برمز تحقق لمرة وحدة، صالح لدقائق، بعدد محاولات محدود، ومخزّن كبصمة مشفّرة مش كنص.
- رموز الجلسات قصيرة العمر، ورموز التحديث بتتبدّل مع كل استخدام؛ وإعادة استخدام رمز قديم بتلغي كل الجلسات المرتبطة فيه.
- كل طلب بيتحقق من عضويتك بالمساحة ودورك فيها قبل ما يرجّع أي بيانات.
- حدود لعدد الطلبات ولمحاولات الدخول ولرسائل الموقع.
- عناوين IP بنحفظها كبصمات مشفّرة بس، لأغراض منع الإساءة.
- الاتصال بين التطبيق والخوادم عبر HTTPS.
ما في نظام آمن 100٪. إذا صار اختراق بيأثر على بياناتك، بنبلغك وبنبلغ الجهات المختصة حسب ما يتطلبه القانون.
١٢. مدة الاحتفاظ بالبيانات
- بيانات الحساب والمساحة: طول ما حسابك فعّال، أو لحد ما تحذفها أو تحذف حسابك.
- طلبات رمز التحقق وسجلات الجلسات: للمدة اللازمة للأمان ومنع الإساءة.
- رسائل الموقع والتطبيق: للمدة اللازمة لمتابعتها والرد عليها.
- البيانات المشتركة اللي سجّلتها بمساحة مشتركة بتضل للأعضاء الباقين بعد حذف حسابك، بدون ربطها برقمك (التفاصيل بالبند ١٣).
١٣. حقوقك
بموجب قانون حماية البيانات الشخصية، إلك الحق:
- تعرف شو البيانات اللي عندنا عنك وكيف بنستخدمها، وتطلب نسخة منها.
- تصحّح بياناتك أو تحدّثها (أغلبها بتقدر تعدّله مباشرة من التطبيق).
- تطلب حذف بياناتك، أو تحذف حسابك بنفسك.
- تسحب موافقتك على أي معالجة بتعتمد على الموافقة، مثل الإشعارات.
- تعترض على معالجة معينة أو تطلب تقييدها.
- تقدّم شكوى للجهة المختصة بحماية البيانات الشخصية في الأردن.
لممارسة أي حق، تواصل معنا (البند ١٦). ممكن نطلب منك تثبت إنك صاحب الرقم قبل ما ننفّذ الطلب.
١٤. حذف الحساب والبيانات
بتقدر تحذف حسابك من «الإعدادات ← حذف الحساب»، برمز تحقق وتأكيد صريح. عند الحذف:
- المساحات اللي إنت عضوها الوحيد بتنحذف مع كل بياناتها.
- المساحات المشتركة بتضل للأعضاء الباقين، وملكيتها بتنتقل لشريكك. ملاحظاتك الخاصة ومهامك الشخصية بتنحذف.
- ملفك الشخصي، إجابات البداية، الجلسات، رموز الإشعارات وسجل إشعاراتك بتنحذف.
- رقم هاتفك بينشال من الحساب، فبتقدر تسجّل فيه من جديد. السجلات المشتركة اللي أضفتها بتضل بدون ما تنربط فيك، حتى تضل حسابات المساحة صحيحة.
- الاشتراكات من المتجر لازم تلغيها بنفسك من Google Play أو App Store.
إذا ما قدرت تدخل على التطبيق، اتبع الخطوات بـصفحة حذف الحساب.
١٥. خصوصية الأطفال
أركان موجّه للمقبلين على الزواج والمتزوجين حديثًا، ومش موجّه للأطفال. لازم يكون عمر المستخدم 18 سنة أو أكثر. إذا عرفنا إنا جمعنا بيانات من شخص ما بينطبق عليه هذا الشرط، بنحذفها.
١٦. التغييرات على السياسة
ممكن نحدّث هاي السياسة مع تطوّر التطبيق. بننشر النسخة الجديدة هون مع تاريخ التحديث، وإذا كان التغيير جوهري بنبلغك داخل التطبيق.
١٦. تواصل معنا
لأي سؤال أو طلب يخص بياناتك، تواصل معنا من صفحة الاقتراحات والشكاوى أو على البريد support@getarkan.app، أو من «الإعدادات ← إرسال ملاحظة أو اقتراح» داخل التطبيق.